X
ئ|
د. شێرکۆ عەبدوڵا

‎منی ئێستا..ئێمەی ئایندە

د. شێرکۆ عەبدوڵا


كاریكاتێرێكی بەناوبانگ هەیە كە زۆر بە جوانی گوزارشت لە سیستمی ئابوری و تێكڕای ڕەهەندەكانی ژیان و بەهاكانی ئەمڕۆمان دەكات.. كاریكاتێری پزیشكێكە كە نەخۆشەكانی لە شێوەی سەد دۆلاریدا ئەبینێ نەك لە شێوەی مرۆڤدا..ئەمە شەقلێكی سەرتاپاگیری هەموو جیهانە..دامەزراوە كۆمەڵایەتییەكان بوونەتە كاڵا:نرخی مەترێك عەرزەی ئەو مزگەوتە ئێستا چەند گەڵایە،قوتابخانە و زانكۆ و نەخۆشخانەكان مانگی چەند دەفتەر خێر دەكەن..ئەقلییەتی قازانجكردن لە هەناوی سیستمی سەرمایەداریدا مەسەلەیەك نی یە ئادەم سمیپ نكولی لێ كردبێ ،بەڵام ئەوەی كە بەدەستهێنانی زۆرترین و خێراترین قازانج ببێتە تاقە ئامانج و پاڵنەری مرۆڤ شتێكی تازەیە..دەستەگوڵی دامەزراوەی ڕاند و تێزی ئابووریناسێكە بە ناوی میڵتۆن فریدمان ..داینەمۆكەشی بەزاندنی یەكێتی سۆڤێت و بردنەوەی جەنگی سارد بوو..ئەم تێزە ئابوورییە دەڵێت كۆمپانیا مرۆڤ نیە ئەركی كۆمەڵایەتی بكەوێتە ئەستۆ بەڵكو دامەزراوەیەكە یەك خودا دەپەرستێت ئەویش زۆرترین و خێراترین قازانجە..ئەقڵییەتی زۆرترین قازانج وەك شێرپەنجە بەناو هەموو جەستەی كۆمەڵگاو بوارەكانی ژیاندا بڵاوبووەتەوە..تەمەنی مرۆڤ لەسەر گۆی زەوی بە بەراورد بە زیندەوەرەكانی تر وەك مناڵێكی دەساڵانە .هێشتا بە بەریەوە هەیە دەیان هەزارساڵی تر بمێنێتەوە،بەڵام ئەم شێوازی ژیان و بیركردنەوەیەی كە هەڵپەیەكی شێتانەیە بۆ بەدەستهێنانی زۆرترین و خێراترین قازانج لە ڕەفتاری كەسێك دەچێ كە بڕیاری داوە خۆی بكوژێت..

‎لێكۆڵینەوە زانستییەكانی ئابووری و كۆمەڵناسی چەندین جار سەلماندویانە كە پارە تاقە سەرچاوە و ئەبەدیترین مەرجی كامەرانی نین.هەرەمەكەی ئۆزلۆ پارەی لە نهۆمی یەكەمی پێویستییەكانی ژیاندا داناوە بۆ دابینكردنی مەرجە فسیۆلۆجییەكانی ژیان و هەستكردن بە ئاساییشی ئابووری ،كەچی ئێمە لە ژێر كاریگەری ئەو ئەقڵییەتە چەوتەدا پارەمان خستووەتە لوتكەی هەرەمەكە..وا دەزانین پارە چەكوشێكە و تێكڕای كێشە و پێویستی و ئالینگارییەكانشمان بزمارن ،لە كاتێكدا كە هەندێكیان برغون.كەم كەس هەیە نەكەوتبێتە ژێر ڕكێفی ئەقڵییەتی زۆرترین قازانجەوە لەسەر حسابی چۆنایەتی.. خراپترین جۆری كاڵا و نزمترین كرێی كار و زۆرترین سوود بۆ خاوەن. پشكەكان ئامانی ئاشكرای هەموو كاسبكارێكە هەر لە كەبابچییەوە هەتا كۆمپانیاكانی مۆبایڵ..هەر ئەم ئەقڵییەتەشە مرۆڤی كردۆتە كڕیاڕێكی گێلی كاڵا بازرگانییە جۆراوجۆرەكان كەزوربەیانمان پێویست نین..سوپەرماركێتەكان پڕن لە جۆرەها پەنیر كە لە كوالیتیدا هەموویان بازاڕیی و چوونیەكن...دوكان و فرۆشگابچووكەكان مایەپووچ بوون و شوێنیان بۆ مۆڵ و سوپەرماركێتە گەورەكان چۆڵ كردووە كە زۆر جار زنجیرەیین و چەند كەسیكی دیاریكراو خاوەنیانن. شار پڕە لە ڕادیۆ و سایت و تەلەفزیۆنی هاوچەشن كە تەنیا لۆگۆکانیان فەرقیان هەیە..تەنانەت لەبواری هونەر و داهێنانیشدا مرۆڤایەتیی داوێتییە دواوە..ئەو پێشكەوتنەی ئێستا بەرهەمی توێژینەوە و لێكۆڵینەوەزانستییەكانی چل پەنجا ساڵ لەمەوبەرە ،كە ئێستا بەتەواوی فەرامۆش كراوە..

پرسیارەكە ئەوەیە ئایا هیچ ڕێگەیەكی دەربازبوون هەیە لەم دۆزەخە؟.دۆزەخی ناعەدالەتی و پیرۆزكردنی پارە تا ئاستی خوداوەند...؟

 ئێنسی ستریكلەر لە كتێبی(ئایندەمان دەتوانێ وابێت)نووسیوێتی چارەسەر لەسەر ئاستی تاك ئەوەیە كە لەبڕیار و كارو كاسپی و داهاتماندا چوار كەس لەبەرچاو بگرین :منی ئێستا،ئێمەی ئێستا،منی ئایندە،ئێمەی ئایندە..هەموو شتێكمان بۆ خۆمان و بۆ ئێستا نەوێت،بەرژەوەندی گشتی ئێستاو ئایندەش لەبەرچاو بگرین..

دیارە دەسەڵاتی كورد بێ تواناترە لەوەی هیچ ڕێگرییەكی پێ بكرێت لەم هەڕەشە كارەساتبارە، بەڵام هیوادارین سەرمایەدارەكان ڕاناوی ئێمە و ئاوەڵفرمانی ئایندە بخەنە دەفتەری حساباتی ڕۆژانەیانەوە.