گرنگ
نرخی نه‌وت له‌ بازاڕه‌كانی‌ جیهاندا
نەخۆشییەکەی فاتیح حەمە خان لە نەخۆشیەکەی دیار ره‌حمان قورستره‌
میدیا عیراقییه‌كان: ئه‌مریكا پێنج موشه‌كی ئاراسته‌كراوی له‌نزیك فڕۆكه‌خانه‌ی هه‌ولێر پۆچه‌ڵكردۆته‌وه‌

هەواڵی کوردستان

یەكگرتوو: بێ باكی حكومەت تەقینەوەی رق و جەماوەری برسی لێدەكەوێتەوە

12/08/2020

میللەت
یەكگرتووی ئیسلامی كوردستان رایدەگەیەنێت، ئیدارەدانی دۆخەكە بەتایبەت لە هەولێری پایتەخت جێگای داخە و ناكرێ حكومەتی هەرێم بەم شێوەیە دەستەوەستان و بێ باك بێ لە بەرامبەر گیانی هاوڵاتیاندا

ئەنجومەنی جێبەجێكردنی یەكگرتووی ئیسلامی كوردستان لە دوای كۆبوونەوەی ئەمرۆی راگەیەندراوێكی بڵاوكردەوەو رایگەیاند، بێ هیوایی گەورەترین مەترسیە لەسەر هەرێم و ناكرێ دەسەڵات و نوخبەی سیاسی وڵات لە ئاستی دا بێ تەگبیر و چارەسەر بن

یەكگرتووی ئیسلامی باسی لەوەشكردوە، پشتگوێ خستنی چاكسازی گشتگیر بۆ رەگ و ریشەی گەندەڵی و ناشەفافیەت لە داهاتی نەوت و دەروازە سنوریەكان نیشانەی نەبوونی ئیرادەی راستەقینەیە

دەقی راگەیاندراوەكە؛
ڕاگەیەندراوی كۆبوونەوەی ئەنجومەنی جێبەجێكردنی یەكگرتووی ئیسلامی كوردستان لەبارەی بارودۆخی تەندروستی و بژێوی هاوڵاتیان و كاسبكاران و فەرمانبەران وموچەخۆرانی هەرێمی كوردستان .. 

ئەمڕۆ چوارشەممە بەرواری 12/8/2020 ئەنجومەنی جێبەجێكردنی یەكگرتووی ئیسلامی كوردستان بە سەرپەرشتی بەرێز مامۆستا سەلاحەدین محەممەد بەهائەدین ئەمینداری گشتی یەكگرتوو كۆبوونەوەی خۆی بە رێگای ئۆنلاین ئەنجامدا.

وێڕای تاوتوێ ی دۆخی تەندروستی و سیاسی و ئابوری هەرێم و عێراق و ناوچەكە بە گشتی و قەیرانە كەڵەكەبووەكانی هەرێمی كوردستان بە تایبەتی. 

كۆبوونەوە لەسەر چەند خاڵێك هەڵوێستەی كرد بەم شێوەیەی خوارەوە : 
1- دۆخی تەندروستی هەرێم و تەشەنەسەندنی پەتای كۆڕۆنا لە حاڵەتی كەمتەرخەمی خۆپارێزی و كەمی كەرستەی چارەسەر و شڵەژاوی ئیدارەدانی دۆخەكە بەتایبەت لە هەولێری پایتەخت جێگای داخە و ناكرێ حكومەتی هەرێم بەم شێوەیە دەستەوەستان و بێ باك بێ لە بەرامبەر گیانی هاوڵاتیاندا.
2- دۆخی بژێوی فەرمانبەران و كەمی و دواكەوتنی موچە و قوفڵ بوونی جوڵەی بازاڕ و بێ باكی و بێ بەرنامەیی حكومەت لە ئاستێكدایە كە تەقینەوەی رق و خەم و بێ چارەیی جەماوەری برسی و گەنجی بێ هیوا گەورەترین مەترسیە لەسەر هەرێم و ناكرێ دەسەڵات و نوخبەی سیاسی وڵات لە ئاستی دا بێ تەگبیر و چارەسەر بن.
3- پشتگوێ خستنی چاكسازی گشتگیر بۆ رەگ و ریشەی گەندەڵی و ناشەفافیەت لە داهاتی نەوت و دەروازە سنوریەكان و خۆخەریككردن و خەڵك خافڵاندن بە هەندێ شتی لاوەكی یەوە یان نیشانەی نەبوونی ئیرادەی راستەقینەیە یان نیشانەی نەتوانین و دەرەقەتنەهاتنە كە هەردوكیان ئەخوازێ حزبەكانی دەسەڵات لەسەری بووەستن و بەخۆیاندا بچنەوە و بڕیاری جدی لەسەر بدەن. 
4- دەستی دەستی كردن بە یەكتری لە هەرێم و سارد و سڕی مامەڵەی كێشەكانی هەولێر و بەغدا لە حاڵەتی ئێستادا هیچ پاساوێكی ئەخڵاقی و نیشتمانی نیە و ئەبێ ئەحكامی لە ناكاو و ئیسعافی پەیرەو بكرێ و هەل و مەرجەكە لەوە زیاتر هەڵناگرێ . 
5- ئێمە لە یەكگرتووی ئیسلامی كوردستان كە هەمیشە لەگەڵ پاراستنی یەكریزیی و ئاشتەوایی نیشتمانی و سەقامگیری سیاسی و كۆمەڵایەتی گەلەكەمانداین و لەگەڵ خواستی رەوای هاوڵاتیان داین ، ئەمڕۆ هەست بە مەترسی پەرچەكرداری تەقینەوەیەكی حساب بۆ نەكراو ئەكەین لەم بێ متمانەیی و بێ وەزعیەی كۆمەڵگە و برسیكردن و فشار و ستەمەی لە هاوڵاتی ئەكرێ و لەم بێ منەتی و بێ باكی و ناكاراییەی دەسەڵاتدا.. 
بۆیە پێویستە بە بڕیاری مەحكەم و بە ئیرادەی بەهێزەوە حكومەت و هێزەكانی دەسەڵات رووبەرووی دۆخەكە ببنەوە تا كار لەكار نەترازاوە و كەشتی دەیان ساڵەی خەبات و خوێن و رەنجی میللەتەكەمان بە هەموو سەرنشینەكانیەوە نغرۆ نەبووە .
بەهیوای بیستن و بڕیاری بەرپرسانە.
ئەنجومەنی جێبەجێكردنی 
یەكگرتووی ئیسلامی كوردستان 
12/8/2020


ئه‌م بابه‌ته 646 جار خوێنراوه‌ته‌وه‌‌

زۆرترین خوێنراو

  • یەک ڕۆژ
  • یەک هەفتە

Millet copyright 2015 © . All right reserved
Avesta Group and powered by Microsoft Azure