X
ئ|

كرێی خوێندن لەزانكۆو پەیمانگە تایبەتەكان بەڕێژەی (١٠بۆ ٢٠%) كەمكرایەوە

هەواڵی کوردستان

پێش 1 هەفتە     231 ژمارەی خوێندراو
Alternate Text

میللەت
بەلەبەرچاوگرتنی بارودۆخی دارایی هاوڵاتیانی هەرێمی كوردستان، وەزارەتی خوێندنی باڵا و توێژینەوەی زانستی، كرێی خوێندن لە زانكۆ و پەیمانگە تایبەتەكان بەپێی ئەنجامەكانی ڕێزبەندی نیشتیمانی زانكۆكانی كوردستان بۆ ساڵی (٢٠١٩)، بەڕێژەی (١٠ بۆ ٢٠ %) بۆ سەرجەم قۆناغەكانی خوێندن كەمكردەوە.

ئەمڕۆ یەكشەمە ڕێكەوتی (٢٢/١١/٢٠٢٠) بەسەرپەرشتی د. ئارام محمد قادر سەرۆكی ئەنجومەنی وەزارەت و وەزیری خوێندنی باڵا و توێژینەوەی زانستی و ئامادەبونی بریكاری وەزارەت و سەرۆك زانكۆكان و ئەندامانی ئەنجومەنی وەزارەت، كۆبونەوەی تەواوكاری ژمارە (١٠)ی ئەنجومەنی وەزارەتی خوێندنی باڵا و توێژینەوەی زانستی بە شێوەی ئۆنلاین بەڕێوەچو.

سەبارەت بە كەمكردنەوەی كرێی خوێندن لە زانكۆ و پەیمانگە تایبەتەكان، د. ئارام محمد قادر وەزیری خوێندنی باڵا و توێژینەوەی زانستی ئاماژەی بە كاری لێژنەی تایبەتمەند لەسەر ئاستی وەزارەت بەم ئەركە كردو دەستخۆشی لێكردن بۆ كارەكانیان لە ڕابردو.

بۆ ئەمەش وتی: هەرێمی كوردستان بە بارودۆخێكی تایبەت گوزەر دەكات بە شێوەیەك پێویستە هەموان ڕەچاوی بارو گوزەرانی دارایی خەڵكی خۆمان بكەین و لە هەمان كاتیشدا بتوانین هەلی خوێندن بۆ هەموان دەستەبەر بكەین، لەو چوارچێوەیەشدا وتی: بۆ ئەوەی روحیەتی كێبڕكێی زانستی لە دامەزراوە ئەكادیمیەكان بپارێزین و بە لەبەرچاوگرتنی باوردۆخی هاوڵاتیان بڕیارماندا بە كەمكردنەوەی كرێی خوێندن لە زانكۆ و پەیمانگە تایبەتەكان ئەویش بەپێی ئەنجامەكانی ڕێزبەندی نیشتیمانی زانكۆكانی كوردستان بۆ ساڵی (٢٠١٩) كە لەلایەن وەزارەتی خوێندنی باڵا و توێژینەوەی زانستی ڕاگەیەنراوە بەم شێوەی خوارەوە:

* ئەو زانكۆیانەی دەكەونە گروپی B، بەڕێژەی (١٠%) كرێی خوێندن كەمدەكرێتەوە.
* ئەو زانكۆیانەی دەكەونە گروپی C، بەڕێژەی (١٥%) كرێی خوێندن كەمدەكرێتەوە. 
* ئەو زانكۆیانەی دەكەونە گروپی D، بەڕێژەی (٢٠%) كرێی خوێندن كەمدەكرێتەوە.
* سەرجەم پەیمانگە تایبەتەكان و كۆلێژە زانكۆییەكان بەڕێژەی (٢٠%) كرێی خوێندنیان كەمدەكرێتەوە.