X
ئ|

ڕاگەیاندراوێك لە وەزارەتی پەروەردەوە

هەواڵی کوردستان

3 رۆژ پێش ئێستا     433 ژمارەی خوێندراو
Alternate Text

میللەت 
وەزارەتی پەروەردەی هەرێم ڕایدەگەیەنێت دوای كۆبوونەوەی لیژنەی باڵای ڕووبەڕووبونەوەی كۆرۆنا چەند بڕیارێكی گرنگ دەركران و جەختیشدەكاتەوە 2ی 2ی 2021 لیژنەكە كۆبوونەوەیەكی دیكە ئەنجامدەدات و هەر بڕیارێكی نوێ پێویست بكات بۆ گۆڕانكاری بریاری لەبارەوە دەدرێت. 

 

 بەگوێرەی راگەیاندراوێكی وەزارەتی پەروەردەی حكومەتی هەرێم كە تیایدا هاتووە ڕۆژی شەممە 16ی 1ی 2021 خوێندن لە قۆناغی 12ی ئامادەیی  بەهەموو بەشەكانییەوە لە قوتابخانە و خوێندنگە حكومی و ناحكومیەكان دەستپێدەكاتەوە. 

ئاماژە بەوەكراوە پرۆگرامی خوێندن بە ڕیزبەندی دەخوێندرێت ڕۆژ وكاتی  تاقیكردنەوەكانی وەرزی و تاقیكردنەوە گشتییەكان بەگوێرەی ئەو خشتانەی كە بە نوسراوی ڕەسمی بڵاودەكرێنەوە و كاریان پێدەكرێت. 

لە ڕاگەیاندراوەكەدا هاتووە لەسەر ڕاسپاردەی وەزارەتی تەندروستی و بەمەبەستی خۆپارێزیی مامۆستایانی بەرێز تەنها ئەوكاتانە لە خوێندنگە دەبن كە وانەیان هەیە و دوای وتنەوەی وانەكانیان پابەند ناكرێن بە مانەوە لەناو خوێندنگە.

جەختكراوەتەوە كە لە ڕۆژی شەممە 16ی 1ی 2021 ی  تا ماوەی یەك هەفتە  ئەو بژارەیە دەخرێتە بەردەم بەخێوكاری قوتابیان و خوێندكاران لە ڕێگای فۆرمێكەوە كە وەزارەتی پەروەردە ئامادەی دەكات و لە قوتابخانەكان پڕدەكرێتەوە  كە بەخێوكار سەرپشك دەكات قوتابیەكەی لە ناو پۆل بخوێنێت یان دەتوانێت خوێندنی ئەلیكترۆنی و ئۆنلاین و پاڵپشتی ماڵەوەی بۆ دابین بكات و نەچێتەوە بۆ قوتابخانە، بەڵام تەواوی تاقیكردنەوە نووسینەكیەكانی لەناو پۆل دەبێت ئەنجامبدات. 

هاوكات ڕێنماییە خۆپارێزییەكان لە ناوەندەكانی خوێندن جێبەجێدەكرێت و بۆ ئەومەبەستە ژووری ئۆپەراسیۆنی پارێزگاو ئیدارە سەربەخۆكان بۆ بابەتی پرۆسەی خوێندن ، كە بەسەرپەرشتی بەرێز پارێزگار یان سەرپەرشتیاری ئیدارە و بەرێوەبەرانی گشتی پەروەردە و تەندروستی پارێزگاو ئیدارە سەربەخۆكان پێكهاتووە ، هەماهەنگی دەكەن بۆ باش بەرێوەچوونی پرۆسەكە.

 وەزارەتی پەروەردە ڕایگەیاند لە ڕووی پرەنسیپەوە , پلانی وەزارەتی پەروەردە پەسەند كراوە بۆ دەستپێكی خوێندنی قۆناغەكانی 1ی بنەڕەتی تا 11ی ئامادەیی  وپەیمانگاكان ، حكومی و ناحكومی  كە لە 1ی 3ی 2021 دەستپێبكات و لە 2ی 2ی 2021لیژنەی باڵا كۆدەبێتەوە بۆ هەڵسەنگاندنی ڕەوشی تەندروستی و هەر بریارێكی نوێ كە پێویست بێت بۆ گۆڕانكاری لەو بەروارە  بۆ قۆناغەكانی ١ ی بنەڕەتی تا ١١ی ئامادەیی بە گوێرەی مەترسییەكانی كۆرۆنا. پاشان وەزارەت پلانی پەسەندكراو بە نووسراوی ڕەسمی گشتاندنی پێدەكات.