X

به‌ ماڵیكردنی كتێبخانه‌

فەرهەنگ

14/01/2021     617 ژمارەی خوێندراو
Alternate Text

هەردی مێد*

 

كتێبخانه‌ هه‌ر شوێنی خوێندنه‌وه‌ و گۆشه‌گیری نییه

له‌وه‌ته‌ی له‌ فه‌ره‌نسام به‌شێكی زۆری ژیان و گه‌نجیم له‌ كتێبخانه‌كاندا به‌ سه‌ر برد و ده‌به‌م. كتێبخانه‌ هه‌ر شوێنی خوێندنه‌وه‌ و گۆشه‌گیری نییه‌، یان خانه‌یه‌كی دوور له‌ كۆمه‌ڵایه‌تی و زینده‌گی‌. به‌ پێچه‌وانه‌وه‌، ناوه‌ندێكی كۆمه‌ڵایه‌تی گرنگه‌ بۆ دروستكردنی په‌یوه‌ندی و تۆڕی هاوڕێیه‌تیش. هه‌ر له‌ كتێبخانه‌، به‌ سه‌ده‌ها هاوڕێی به‌رازیلی، بریتانی، ئه‌ڵمانی، شیلی، تونسی، مه‌غریبی، ئیتالی، سه‌نیگالی، كۆنگۆی، تد،م بۆ دروست بوون. له‌گه‌ڵ ئه‌واندا به‌ یه‌كه‌وه‌ڕا ده‌مانخوێند و به‌ یه‌كه‌وه‌ڕا گفتوگۆمان ده‌كرد. چه‌ند له‌ كتێبه‌كاندا فێری زانست و هونه‌ر ده‌بووم، ئه‌وه‌نده‌ش له‌وان و له‌ ئه‌زمونی ئه‌وان. نیوه‌ڕوان به‌ دیار نانخواردنه‌وه‌، ده‌كه‌وتینه‌ به‌راوردكردنی گۆڕه‌پان و كێڵگه‌ی كار و لێكۆڵینه‌وه‌كانمان، من گۆڕه‌پانی كوردم بۆ باس ده‌كردن، ئه‌وانش مه‌یدانی لێكۆڵینه‌وه‌ی خۆیان. به‌ راستی، بۆ یه‌كتر ئیلهام و وزه‌ و بیرۆكه‌ به‌خشبووین.

كتێبخانه‌ شوێنی ته‌ركیز و چڕبونه‌وه‌یه‌

زیاد له‌مه‌، له‌ كتێبخانه‌ مرۆڤ فێری هه‌روه‌ها لێكۆڵینه‌وه،‌ و به‌ ده‌ستهێنانی مه‌یلی سۆراخكردن و ئۆقره‌ی دانشتن ده‌بێت. كتێبخانه‌ فێرت ده‌كات بۆ ماوه‌یه‌كی زۆر به‌ سه‌ر شان و ملی كتێب و نووسینه‌كانته‌وه‌ شۆڕ بیته‌وه‌ و له‌ جرت و فرت دوور بكه‌ویته‌وه‌ و به‌ سه‌ر بیركردنه‌وه‌تدا چڕببیته‌وه‌. كتێبخانه‌ شوێنی ته‌ركیز و چڕبونه‌وه‌یه‌.  به‌ هه‌ر حاڵ، خانه‌یه‌كی به‌ پیت و به‌ فڕه‌ بۆ فێربوون له‌ پرسی چڕبونه‌وه‌ و خۆگرموڵه‌كردن به‌ سه‌ر خۆتدا. له‌م سۆنگه‌یه‌وه‌، به‌ ئه‌زموونی خۆم، قه‌رزاری كتێبخانه‌م.

 له‌ زانكۆ دڵداری و قۆزێنی له‌ نادی و حه‌وشه‌ی زانكۆ، كتێبخانه‌ی كردبوو به‌ ماڵێكی چوڵ 

مخابن، له‌ كوردستان زۆرجار هه‌م له‌ كتێبخانه‌ی زانكۆ، هه‌م له‌ كتێبخانه‌ی شاره‌كان به‌ ته‌نها، یان چه‌ند كه‌سێكی كه‌م بووین. خوێندكار و خوێنه‌ران سه‌ردانی كتێبخانه‌یان نه‌ده‌كرد. له‌ زانكۆ دڵداری و قۆزێنی له‌ نادی و حه‌وشه‌ی زانكۆ، كتێبخانه‌ی كردبوو به‌ ماڵێكی چۆڵ و كونه‌به‌بوو تێدا ده‌خوێن. له‌ شاره‌كانش كه‌م كه‌س هه‌ر ده‌یزانی كتێبخانه‌ هه‌یه‌. من خۆم چه‌ندینجار به‌ ته‌نها له‌ كتێبخانه‌ خۆم دیووه‌ته‌وه‌. 

بره‌ودان به‌ كتێبخانه‌ پێداویستیه‌كی حه‌تمی و هه‌لومه‌رجێكی سه‌ره‌كیه‌ بۆ په‌ره‌پێدانی نوسین و خوێندنه‌وه‌ و كوولتور.

 

* مامۆستا له‌ زانكۆی سۆربۆن