X

حكومەتی هەرێمی كوردستان: توركیا كارەبای دهۆكی بڕیوە

هەواڵی کوردستان

پێش 1 هەفتە     175 ژمارەی خوێندراو
Alternate Text

میللەت
حكومەتی هەرێمی كوردستان سێ هۆكار بۆ كەمبوونەوەی كارەبای نیشتمانیی دەخاتەڕوو و یەكێكیان بڕینی ئەو كارەبایەیە كە توركیا بۆ پارێزگای دهۆكی دابین دەكات.


ئەمڕۆ فەرمانگەی میدیا و زانیاری حكومەتی هەرێمی كوردستان ڕاگەیەندراوێكی دەربارەی هۆكاری كەمبوونەوەی كارەبای نیشتمانیی بڵاوكردەوە و تێیدا هاتووە: "لەم ماوەیەدا، کاتژمێرەکانی پێدانی کارەبا لە سەرجەم شاروشارۆچکەکانی هەرێمی کوردستان کەم بووەتەوە و لە سێ ڕۆژی ڕابردووشدا ئەو بڕە بووەتە ١٦ کاتژمێر و ٢٠ خولەک، بۆیە بە پێویستی دەزانین لەو بارەیەوە ڕوونکردنەوەیەک بدەین".

ڕوونیشیكردەوە كە یەکێک لە هۆکارەکانی کەمبوونەوەی کارەبا بۆ وێستگە ٣٠٠ مێگاواتییەکەی خەبات دەگەڕێتەوە کە لە ژێر چاککردنەوە دایە و بڕیارە لە ڕۆژی 5/١٢/٢٠٢١ی ئەمساڵ بکەوێتەوە کار.

سەبارەت بە کارەبای هاوردەکراوی پارێزگای دهۆکیش لە ڕاگەیەندراوەكەدا هاتووە "کە ١٥٠ مێگاواتە و لە وڵاتی تورکیاوە دەکڕدرێت، لە لەلایەن تورکیاوە ڕاگیراوە و حکومەتی هەرێمی کوردستان لە هەوڵی چارەسەرکردنیدایە".

ئەوەشی خستەڕوو كە وێستگەی بەرهەمهێنانی کارەبای ئەگریکۆی گەرمیان، یەکێکی دیکەیە لە وێستگەکانی بەرهەمهێنانی کارەبای نیشتمانی و بڕیار وایە لەگەڵ زیادکردنی بەرهەمی گاز بۆ ئەو وێستگەیە بڕی پێدانی کارەباکەی لە ١٦٥ مێگاواتەوە بگاتە ٢٠٠ مێگاوات و بڕیارە لە ٢8/١١/٢٠٢١ بکەوێتە کار.

فەرمانگەی میدیا و زانیاری لە كۆتایی ڕاگەیەندراوەكەیدا دەڵێت: "کارەبا سامانێکی نیشتمانییە و پێویستە هەموولایەکمان بە پێی پێویستیی ڕۆژانە بە کاری بهێنین تا بتوانین لەم ڕێگەیەوە ماڵی هەموو هاونیشتمانییەک ڕووناک بکەینەوە".