X

مه‌كته‌بی سیاسی یه‌كێتیی نیشتمانیی كوردستان راگه‌یه‌ندراوێكی بۆ كۆچی دوایی د.مارف عومه‌ر گوڵ بڵاوكرده‌وه‌

هەواڵی کوردستان

پێش 2 هەفتە     110 ژمارەی خوێندراو
Alternate Text

میلله‌ت

مه‌كته‌بی سیاسیی یه‌كێتیی نیشتمانیی كوردستان بۆ كۆچی دوایی د.مارف عومه‌ر گوڵ، رایگه‌یاند كه‌ کۆچی دوایی دکتۆر مارف خەسارەتێکی تربو لەگەلەکەمان کە کەسێکی تێکۆشەر و ئەکادیمی وەهای‌ لە دەستدا.


مه‌كته‌بی سیاسیی یه‌كێتیی نیشتمانیی كوردستان ئه‌مڕۆ شه‌ممه‌ له‌ راگه‌یه‌ندراوه‌كه‌یدا ده‌ڵێت: "دکتۆر مارف عومەر گوڵ لە ماوەی‌ ئەو چەند ساڵەی‌ ژیانیدا گەنجینەیەکی پڕ لە زانیاری‌ و زانستی یاسایی بوە لەسەر پرسەکانی جینۆساید و وەک سەرچاوەیەکی گرنگی ناوندە ئەکادیمی و سیاسیەکان بوەو بە کۆچی دوایی خەسارەتێک لە هەموان کەوت."

ده‌قی راگه‌یه‌ندراوه‌كه‌:

خانەوادەو کەس و کاری‌ تێکۆشەر و پێشمەرگەی‌ دێرین و پرۆفیسۆری یاریدەدەر دکتۆر مارف عومەر گوڵ .

بەناوی گشت هەڤاڵانی مەکتەبی سیاسی یەکێتی نیشتمانیی کوردستانەوە بۆ کۆچی دوایی دکتۆر مارف دڵگرانی خۆمانتان پێڕادەگەیەنین و هاوبەشی پرسە و خەم و پەژارەتانین .

کۆچی دوایی دکتۆر مارف خەسارەتێکی تربو لەگەلەکەمان کە کەسێکی تێکۆشەر و ئەکادیمی وەهای‌ لە دەستدا کە لە هەڕەتی لاوێتەوە لە نێو جوڵانەوەی سیاسیدا و لە خەباتی نهێنیدا لە سەرەتای هەشتاکاندا لەلایەن رژێمی بەعسەوە توشی گرتن و ئەشکەنجە بۆتەوە ، لە هەردوو شۆڕشی ئەیلول و شۆڕشی نوێشدا لە پاڵ خەباتی چەکداریدا وەک نوسەر لە گۆڤار و بڵاوکراوەکانی شاخدا خاوەنی چەندین بەرهەم و نوسینی ئەدەبیی شۆڕشگێڕانەی‌ بەرگری بوە .

دکتۆرمارف بۆ درێژەدان بە خەباتی سیاسی کوردایەتی لە ڕوی‌ ئەکادیمیەوە وەک یەکەمین کورد لە سەر پرسی تاوانی جینۆسایدی گەلی کورد لە ساڵی ١٩٩٠ لە زانکۆی‌ کیف بڕوانامەی‌ ماستەری‌ بە دەست هێناو و لە ساڵی ١٩٩٥ یشدا لە هەمان زانکۆ دکتۆرای وەرگرت و دواتر لە ساڵی ٢٠٠٥ وە بەم هەگبە پڕ لە زانستەوە گەڕایەوە کوردستان و بوە ڕاگری کۆلێژی یاسای زانکۆی کۆیە و پاشان راگری کۆلیژی یاسای زانکۆی سلێمانی بوە .

دکتۆر مارف عومەر گوڵ لە ماوەی‌ ئەو چەند ساڵەی‌ ژیانیدا گەنجینەیەکی پڕ لە زانیاری‌ و زانستی یاسایی بوە لەسەر پرسەکانی جینۆساید و وەک سەرچاوەیەکی گرنگی ناوندە ئەکادیمی و سیاسیەکان بوەو بە کۆچی دوایی خەسارەتێک لە هەموان کەوت .

جارێکی تر پرسە و هاو خەمی خۆمان بە خێزان و کەس و کاری دکتۆر مارف عومەر گوڵ دەگەینین و لە یەزدانی مەزن داواکارین ڕۆحی کۆچ کردو بە بەهەشتی بەرین شاد بکات و دوا ناخۆشی هەموو لایەک بێت .

انا للە و انا الیە راجعون
مەکتەبی سیاسی
یەکێتی نیشتمانی کوردستان
١٥ ی‌ کانونی دووەمی ٢٠٢٢