X

هاتوچۆ هۆشداری بەشۆفێران دەدات

هەواڵی کوردستان

15/01/2022     357 ژمارەی خوێندراو
Alternate Text

میللەت
هاتوچۆی سلێمانی لە بارەی ئامادەكردنی ئۆتۆمبێل پێش بەفربارین ئاگادارییەكی بڵاوكردەوە.

 بەڕێوبەرایەتی هاتوچۆی سلێمانی لە بارەی ئامادەكردنی ئۆتۆمبێل پێش بەفربارین ئاگادارییەكی بۆ شۆفێران بڵاوكردەوە و تیایدا هاتووە، پێویستە پێش ئەوەی بەفر ببارێت، لە پێناو سەلامەتی شۆفێری كردن و پاراستنی گیانی شۆفێران و سەرنشینەكانیان پێویستە ئەم رێنماییانە لەبەرچاو بگیرێن.

ڕێنماییەكانی هاتووچۆی سلێمانی بۆ شۆفێران بەم شێوەیە هاتووە:
١) ئامادە كردنی ئۆتۆمبێلەكەت بە دڵنیا كردنەوە لە چەند خاڵێكی گرنگ:
* پێویستە ئەنتی فرییز ( شلەی دژە بەستن) بكەیتە ناو دەبەی ڕادێتەری ئوتومبیلەكەت.
* دڵنیاكردنەوە لە سیستەمی برێك لە ئوتومبیلەكەتدا ( سیستەمی ABS بەباشی كار بكات، نەبوونی لیك و لێچوون لە سیستەمی برێكدا)
* تایەی ئوتومبیلەكەت پێویستە چاڵ و خەتەكانی لە ڕێژەی دیاریكراوی یاسایی كەمتر نەبێت و بڕی دروست هەوایان تیادا بێت و نابێت هەوای كەم بێت.
* فڵچەی جامەكان بە باشی كاربكات.
* سیستەمی گەرمی ئوتومبیلەكە و هیتەری نەهێشتنی تەم بە باشی كار بكەن.
* پێویستە پاتری ئوتومبیلەكەت نوێ بێت و هیچ كێشەی نەبێت.

٢)  كەمكردنەوەی خێرایی بۆ ڕادەیەك كە توانای وەستاندنەوەی ئۆتۆمبێلەكەت هەبێت واتە لە ناو شارەكان خێرایی لە 30 بۆ 50 كلم/ كاتژمێرێك و نابێت زیاتر بێت هەروەها بۆ دەرەوەی شارەكان لە 60 كلم یان كەمتر بەگوێرەی بارودۆخی شەقامەكە خێرایی كەم و زیاد دەكەیت.

٣) پاراستنی ماوەی سەلامەتی لەنێوان ئۆتۆمبێلەكەی خۆت و ئۆَتۆمبێلی بەردەمت، ئەم خاڵە گرنگییەكی زۆری هەیە چونكە توانای وەستاندنەوەی ئوتومبیل لە بەفر باریندا كەم دەكات بۆیە پێویستە ماوەیەكی دیاریكراوت هەبێت بۆ وەستاندنەوەی ئوتومبیل.

٤) ئیشكردنی ڕووناككەرەوە(گڵۆپ)ی نزم و ڕووناككەرەوەی تەم گرنگییەكی زۆری هەیە چونكە بارینی بەفرو بوونی تەم ڕێژەی بینین كەم دەكاتەوە.

٥)  پێویستە بانزینی تەواو لە ئۆتۆمبێلەكەتدا بێت بۆكاتی پێویست و قەرەباڵغی.

٦) نابێت شۆفێر بە شپرزەیی و لەناكاو ئیستۆپ بگرێت بەڵك و بەنەرمی و لەسەرخۆیی.

٧) سەردان نەكردنی ناوچە شاخاوییەكان بەهیچ شێوەیەك بەمەبەستی گەشت و بەسەربردنی كات.
٨) بوونی بەتانییەك لە ناو ئۆتۆمبێلەكەت ئەگەر ناچار بوویت گەشتێك بۆ دەرەوەی شارەكان ئەنجام بدەیت.
٩) دیاریكردنی خێرایی (تحدید سرعە Cruise control) لەكاتی باران بارین و بەفردا بیكوژێنەرەوە چونكە دیاریكردنی خێرایی لەم كاتانەدا وا دەكات كە كۆنترۆڵی ئوتومبیلەكەت لە دەست بدەیت، لەوانەیە تۆ وابیربكەیتەوە كە هاوكاریت دەكات و لەخێراییەكی دیاریكراودا دەتهێڵێتەوە، بەڵام ئەگەر ئوتومبیلەكەت بخلیسكێت و دیاریكردنی خێراییت كار پێكردبێت لەم كاتەدا ئوتومبیلەكەت خێراتر دەبێت و ڕەنگە زیانەكان زۆر زیاتر بكات.
١٠) لەكاتی بوونی حاڵەتی نەخوازراو ڕاستەوخۆ پەیوەندی بكرێت بەلایەنە پەیوەندیدارەكان.
ڕێپێدراوی هاتوچۆ - هێمن سالار
سەنتەری ڕێكخستنی پەیوەندییەكان JCC  ژمارە ١٠٠ - سلێمانی
هاتوچۆ ١٨٨
پۆلیسی فریاكەوتن ١٠٤
فریاگوزاری تەندروستی ١٢٢
بەرگری شارستانی ١١٥

زۆرترین خوێنراو