دانانی پرسە لەم شوێنانە قەدەغەكرا

هەواڵی کوردستان

Alternate Text

میللەت 
ژوری ئۆپەراسیۆنی پارێزگای هەولێر بڵاویكردەوە كە جگە لە هۆڵەكان، پرسەدانان لە "كۆڵان - ماڵ - ژێرخێوەت - باخچە و هەرشوێنێكی دیكەی گشتی" بەهەمو شێوەیەك قەدەغەیە و هەر كەس پابەند نەبێت سزا دەدرێت.
بەگوێرەی راگەیەنراوێكی ژوری ئۆپەراسیۆنی پارێزگای هەولێر كە تێیدا هاتوە ، پاڵپشت بە بڕیار و ڕاسپاردەكانی لیژنەی باڵای روبەڕوبونەوەی كۆرۆنا لە هەرێمی كوردستان بۆ بابەتی پرسەدانان بەڕێوەبەرایەتی گشتی ئەوقافی هەولێری راسپێردراوە كە سەرنج و پیشنیارەكانیان پێشكەش بەوەزارەتی ئەوقاف و كاروباری ئاینیی بكەن، تاوەكو بڕیار و رێنمایی نوێی لەبارەی پرسەدانان دەربكرێت، لە ئێستادا بە بڕیاری وەزارەتی ئەوقاف و كاروباری ئاینی هۆڵەكانی پرسەدانان بە ڕێنمایی و رێوشوێنی خۆپارێزی كراوەتەوە.

لە راگەیەنراوەكە هاتوە جگە لە هۆڵەكان، پرسەدانان لە "كۆڵان - ماڵ - ژێرخێوەت - باخچە و هەرشوێنێكی دیكەی گشتی" بە هەمو شێوەیەك قەدەغەیە و  هەر كەسێك پابەند نەبێت سزا دەدرێت و جگەلەوەش بنكەكانی پۆلیس، ئاسایش، شارەوانی و موختاری گەڕەكەكان ڕاسپێردراون چاودێری سنورەكانی خۆیان بكەن و رێكاری پێویست لەبەرامبەر هەركەسێك بگرنەبەر كە سەرپێچی دەكات.

ئاماژەبەوەكراوە ژوری ئۆپەراسیۆنی پارێزگای هەولێر داوا لەهاوڵاتیان دەكات بۆ پارێزگاریكردن لەگیانی خۆیان و ئازیزانیان پابەندی ئەو بڕیارانەبن و جگە لەهۆڵەكان كە لەئێستادا بۆ پرسەدانان كراوەن لەهیچ شوێنێكی تر پرسە دانەنرێت.

 

زۆرترین خوێنراو